{"id":2720,"date":"2013-08-13T00:46:17","date_gmt":"2013-08-12T22:46:17","guid":{"rendered":"http:\/\/www.historielaget.jostedal.no\/?page_id=2720"},"modified":"2013-08-21T23:22:16","modified_gmt":"2013-08-21T21:22:16","slug":"flaumen-1979","status":"publish","type":"page","link":"https:\/\/www.historielaget.jostedal.no\/?page_id=2720","title":{"rendered":"Flaumen i 1979"},"content":{"rendered":"

Den st\u00f8rste kjende flaumen i Jostedalen var 15. august 1979. I Foss\u00f8yane stod vatnet 1,35 m over flaummerket fr\u00e5 1898 som var hogge inn i fjellet. \u00c5rsaka til flaumen var mykje regn kombinert med varmt ver som f\u00f8rte til stor smelting fr\u00e5 brear og mykje attverande sn\u00f8 i fjellet. Elva steig mykje utover dagen 14. august, og flaumen kulminerte litt etter midnatt 15. august.<\/p>\n

\"Banken<\/a>Etter moderne utrekningar var det ein 200-\u00e5rsflaum, og \u00f8ydeleggingane var store b\u00e5de langs hovudelva og langs fleire sideelvar. Av sideelvane gjorde Sagar\u00f8yelvi st\u00f8rst skade. Ho fann eit nytt l\u00f8p gjennom bankbygget (gamle kommunehuset). Hovudelva gjorde st\u00f8rst skade p\u00e5 elveflatene i Myklemyr og Foss\u00f8yane fordi vatnet stuva seg opp i Foss\u00f8ygj\u00f8let og Hauk\u00e5sgj\u00f8let. Her rann elva inn i andre h\u00f8gda i somme hus. Kring 100 bustadhus og 30-40 driftsbygningar fekk skadar. Seks store bruer og ei rekkje mindre vart \u00f8ydelagde, og riksvegen til Jostedalen fekk store skadar med den fylgja at dalen var isolert i to veker. Varelagera til to butikkar vart \u00f8ydelagde, og 150 m\u00e5l dyrka mark vart skadd. Dei samla skadane utgjorde 32 mill kr (tilsv. 116 mill kr i 2012).<\/p>\n

\"VG<\/a>Ingen menneskeliv gjekk tapt, og ingen vart heller skadde, men situasjonen vart oppfatta som s\u00e6rs dramatisk av mange som stod midt oppi det. Dei som budde utsett til, vart evaukerte fr\u00e5 heimane sine. Mange turistar vart stengde inne i dalen, og bilane deira vart frakta ut med helikopter. Jostedalen vart erkl\u00e6rt som katastrofeomr\u00e5de, og Forsvaret vart sett inn i oppryddinga. Flaumen prega det nasjonale nyhendebiletet, og Kong Olav vitja Jostedalen etter flaumen.<\/p>\n

Leird\u00f8la kraftverk <\/a>var ferdig \u00e5ret f\u00f8r, og Tunsbergdalsmagasinet hadde kapasitet til \u00e5 ta imot vatnet fr\u00e5 Leird\u00f8lavassdraget. Dette hindra truleg store \u00f8ydeleggingar i Gaupne.<\/p>\n

Etter flaumen kom det i gang eit omfattande arbeid med f\u00f8rebygging. Flaumen vart eit viktig argument for den planlagde kraftutbygginga<\/a>, og magasinet p\u00e5 Styggevatnet med dei 22 bekkeinntaka i sideelvane p\u00e5 heile p\u00e5 austsida av dalen har redusert faren for storflaum i hovudelva kraftig. Det vart \u00f2g bygt h\u00f8gare flaumverk langs Josted\u00f8la b\u00e5de i Foss\u00f8yane, Elv\u00f8y, Myklemyr og Alsmo. Fossagj\u00f8let og Hauk\u00e5sgj\u00f8let vart dessutan senka og utvida.<\/p>\n

Les meir<\/strong><\/p>\n