Jostedal historielag

Stadnamnprosjektet i Jostedalen nærmar seg no slutten etter ti års arbeid. Namna i gardsområdet er leverte til Fylkesarkivet, som no er i gang med å gjere dei tilgjengelge på Internett i lag med namn frå resten av Luster kommune. I Jostedalen arbeider Olav Stølen og Kristen Ormberg med å gjere ferdig namna på fjellkarta.

Til no er berre namna i Fåberg og eit område framme i Stordalen på nettet, men dei får fint fram korleis løysinga vil bli. Gå til fylkesatlas.no => «Kultur og historie» => «Stadnamn». Før eller etter ein gjer dette, må ein zoome inn på Luster/Jostedalen.

Stadnamn for Luster på Internett (fylkesarkiv.no) (2.5.2013)

Stadnamn i Fåberg på fylkesatlas.no

Fyrste nummeret i år av tidsskriftet Heimen kom nyleg ut, og der står artikkelen «Offentlege krisetiltak i Jostedalen 1742-43″. Han byggjer på føredraget på årsmøtet i Jostedal historielag i fjor.

Artikkelen ligg ikkje på nettet, men nærare omtale og peikar til kjeldene ligg her.

Vedteken på årsmøtet 7. mars 2013. Les meir »

Godkjend på årsmøtet 7.3.2013. Les meir »

Det vert årsmøte i Jostedal historielag torsdag 7. mars kl 20.00 på Jostedal hotell.

Saker

1. Vanlege årsmøtesaker

2. «Hundre år med allmenn røysterett. Om vilkåra for kvinners politiske påverknad i Noreg og i Sogn og Fjordane gjennom siste hundreåret», ved Hege Roll-Hansen

3. Servering

Om temaet

I 1913 fekk kvinnene allmenn statsborgarleg røysterett, og Stemmerettsjubileet vert i år feira over heile landet. Hege Roll-Hansen er førsteamanuensis i historie ved Høgskulen i Sogn og Fjordane. Ho er engasjert for å skrive band 4 (etter 1945) i den nye fylkeshistoria for Sogn og Fjordane som er under arbeid. Ho vil sjå kvinnerøysteretten i samanheng med utviklinga av den politiske deltakinga for kvinner og kvinnerettar med vekt på Sogn og Fjordane.

I 1995 fekk Jostedal historielag ei gamal samling med oppunder 50 bunadsdeler i gåve. Dei var utstilte på Breheimsenteret og gjekk tapt i brannen sommaren 2011. Heldigvis hadde Norsk institutt for bunad og folkedrakt ved Valdresmusea dokumentert kleda på kartotekkort og teke ei rekkje bilete. Historielaget har skanna katalogkorta, og dei er no tilgjengelege her på nettstaden vår.

Sjå bunadsutstillinga.

Årets JSA er på veg ut i dei mange hundre heimar, og som vanleg er det mykje historisk stoff innimellom alt det andre. Me nemner:

• Jubileumsfeiring for Jostedal Helselag (s. 20-22), av lagsstyret – om 90-årsjubileet i 2012 med eit historisk tilbakeblikk
• Kulturkveld i Berget (s. 48), av Olav Stølen – om barsokfeiringa 5. september
• Førtiåringane (s. 63-64), av Eli Bjørhusdal – om 1972-kullet frå Jostedalen
• Eit intervju med «Mr. Nigardsbreen» – Steinar Bruheim (s. 76-77), av Olav Grov – med tilbakeblikk på den 25-årige soga til verksemda
• Spelemannsslektene i Jostedalen (s. 96), av Renate Halveg og Gunnar Elgersma
• Ei liti soge (s. 97), av Olav H. Hesjevoll – om då Falkenberg kom til Jostedalen som prest i 1913
• Gamle soger (s. 98), av Kristen Ormberg – oppmoding om å samle inn gamle forteljingar
• Hytta på Fåbergstølen 100 år (s. 99), av Mary Aasen – om «turistforeningshytta»
• Avskrift av den eldste kyrkjeboka (s. 100), av Oddmund Hoel – omtale av avskrifta
• Nettutstilling med Sjur Hesjevoll (s. 100), av Oddmund Hoel – omtale av utstillinga
• Målet vårt (s. 102), av Anne Berit Faaberg – den faste spalta
• Ein tilfeldig ferjetur, ein elefantsnabel og Fairtrade (s. 103), av Anne Elgersma – om Eduard Dekker, ein av Nederlands mest kjende forfattarar
• Historisk leksikon om Jostedalen på Internett (s. 106), av Oddmund Hoel – om lokalhistoriewiki
• Siste nytt frå 1600-talet: Høyrde Jostedalen til Luster eller Hafslo etter nyryddinga? (s. 107-110), av Oddmund Hoel – sjå nettversjon

I dag er det 10 år sidan nettstaden til Jostedal historielag opna. Noko av det fyrst som kom på nett, var omtale av boka til Alfred Espe, Ivar Aasens reiseskildring frå Jostedalen, skattematrikkelen 1647 og stoff om Jostedalsrypa og Justedalens kortelige beskrivelse. I dag er det ca 430 sider og pdf-dokument her.

Me markerer 10-årsdagen med ei ny side på Facebook. Der vil me framover informere om aktiviteten til laget og oppdateringar på nettsida, og alle som vil kan leggje inn historisk stoff og bilete.

Sommaren lakkar mot slutten, men i Berget i Fåberg er det framleis vakkert og stemningsfullt. Derfor inviterar Jostedal Historielag til hyggeleg samvere i Berget

onsdag den 5. september kl 17.00

Else Marie Haugen og Arvid Elvekrok vil underhalde med lokal musikk tilpassa Gamle Barsok. Historielaget vil fortelje om Berget, kva me driv med, og om planar framover. Det vert også høve til å prøve seg med litt onning, med ljå, sigd eller snel.

Parker nede ved Store kloppi i Fåberg (vert sett opp skilt), gå og få opp pulsen, og nyt den flotte utsikta opp til Berget. Det skjerpar appetitten til rømmegraut, spekemat, kaffi og kaker til rimelig pris!

Velkommen til Berget!

Jostedal Historielag

Den eldste kyrkjeboka for Jostedal prestegjeld dekkjer perioden 1733-1751. Me har no lagt ut ei fullstendig avskrift av dei 68 sidene i protokollen som framleis finst. Her kan jostedølene og jostedalssamfunnet følgjast frå veke til veke og til tider frå dag til dag, i gleder og sorger. Gå til avskrifta og nærare omtale.